جواز و اتجوزنا

راقص التنوره

2011-09-13T15:44:00.000-07:00

وقف على المسرح فى ثبات

بملابسه المميزه الاشكال و الالوان

و على الانغام الصوفيه بدأ فى الدوران

و كلما زادت سرعه دورانه ارتفع التنورته فى اشكال و الوان بديعه

كان الجميع لا يستطيعوا ان يحيدوا اعينهم عنه

لكنه كان لا يشعر بوجودهم

فهو فى عالم آخر ....وحده كان يدركه

على اصوات الدفوف يخفق قلبه و بشده

و كانت اصوات الاناشيد كلما علت

علت معها روحه إلى السماء

و ارتفعت تنورته اكثر و اكثر

و كانت كلما اسرعه فى دورانها

تمنح روحه الطاقه على الصعود إلى السماء

و كأن فى دورانه يؤدى علاقه روحيه خاصه

تظل روحه تصعد إلى السماء و تكاد ان تعانقها

إلى هنا تنتهى الاناشيد و يقف هو

يصفق الحضوربقوه من شده الانبهار

تلتف عليه التنوره بقوه و ثم تقف فجأه

اما هو فقد كان لا يأبه و لا يشعر

فمع توقف تنورته عن الطيران رجعت روحه إلى جسده

فى الم يدركه كل مره دخل فيها إلى تنورته و يمارس طقوسه

فكل مره كانت روحه تريد ان تظل هناك تعانق السماء

إمــــــرآه غـــــجريه

2011-06-21T17:31:00.000-07:00

هل صادفت يوما إمرأه غجريه

هات يديك آخذك لعالم وواحده منهن

هى إمرأه ولدت الغوايه بين شفتيها

تتحداك بتفاصيل واضحه المعالم

تختار فستانها بدقه

فاتظهر ما يجعلك تشتاق أكثر إلى المزيد

تلبس من الحلى الفضى الغريب الشكل منقوش فيه اساطيرهم المنسيه

تلك الجلاجل فى رجليها نغم يشدوا كلما مشيت .. فينتبه الكل لمن تمشى على الارض فى خيلاء

ترقص رقصتها الغجريه و تعلم ان عيناك لا تفارقهما ابدا

شعرها جدائله تنساب فى فوضى تقصدها فتزداد انت جنون

تنظر إلى عينيها فترى فيها تحدى سافر بأنك لا تستطيع الاقتراب

دعنى افتح لك كروت التاروت

و اقول لك اكبر اسرارك

انها تخبرك انك عاشق إمرآه غجريه و تذوب فيها عشقا

تلك التى لا تستقر فى ارض ما ابدا

تاركه ورائها قلوب ادماها هواها

راجيه منها البقاء

و لكنها أليت على نفسها سوى مواصله البحث عن عيون اخرى تظن انها تستطيع مقاومتها

فاتكسب راهانها تاكه خلفها من ظن انها إمرأه عاديه

نعم فهى إمرأه استثنائيه

طلاسم سحر

2011-04-21T17:44:00.000-07:00

كما افعل دائما انقش كلماتى على شفاهك
كلما هممت بالكلام تناثرت حولك حروفى
و تتجمع مره اخرى ...ناطقه باروع المعانى
قائله اروع اشعارى
تتراقص فى خيلاء بين شفاهك و كيف لا و هى تلازمك مثلما اردت منها ان تفعل
ارى حركاتها تتمايل كأروع راقصات الباليه
تتمايل .. تنحنى ...تلف ..تجرى
ثم تعود بسرعه فهى لا تطيق عنك فراق
فهل اتعتدت انت على وجودها حولك
هل تشتاق إليها مثلما تشتاق إليك
اراك قد ادمنتها و لا تستطيع عنها فراق
تلك هى نقوشى السحريه ... ازيد فيهاو كل مره ازيد فيها و ابدع
كل مره ازيد نقوشى اقترب منك و اضعها فى ترتب معلوم اسراره بالنسبه لى
و اعلم انك تعلم اننى ساحره و انت بسحرى عالم

قبل السكوت

2010-10-18T13:40:00.001-07:00

لم يعرف ما الذى دفعه للسقوط و لم يسأل

فقط نظر إلى النتيجه...... انه سقط من اعلى دور فى البرج العالى الذى صنعه بنفسه و تعب فى صنعه

فكره واحده كانت مسيطره عليه فى وقت السقوط

لم يكن يسأل لماذا سقط من برجه العالى

فقط سأل لماذا هو مرتاح لفكره السكوت

كان يظن انه سوف يصرخ طالبا فرصه جديده فى البقاء

او انه سوف يصرخ الما من الغدر و هو ينظر فى عيون من خدعوه فى نظره اخيره كلها اتهام و الم

او ان يكون فى عيونه نظره المدبوح

يصرخ و يصرخ و يصرخ

لكنه رجاء و رجاء و رجاء

لكن فى صوره صراخ

فقد ارتاح لفكره السكوت

الغريب انه لم يحس بألم الارتطام

فهناك دائما مقابل للراحه

و قد وجد راحته فى السكوت فسكت

قصه مدينه

2010-10-10T14:17:00.000-07:00

لم تكن مثلها مثل كل المدن

ليس لانها اجملهم لكنها و لشده حصونها كانت تحدى لكل من اغتر بقوته فظن انه واحده قادر على ان يغزوها

حاول الكثير و لم يستطيعوا الاقتراب حتى من حدود حصونها

فيستديوا محملين بخيبه الامل...... فلم يكتب لهم النصر فما ارادوا

وحدها المدينه كانت تعلم و تثق فى قوه حصونها فهى من صنعتها و ذادت فيها مع مرور الزمن

فى يوم ما اتى ذلك الفارس الذى حاصرها دون حصار

حتى لنه لم يُعلمها انها محاصره

تسلل مثما يتسلل الماء فى هدوء و انسيابيه

و لم يكن اصعب على الحصون من مقاومه الماء

فقد اتاها الخطر من حيث لم تحتسب

عرف انه احدث شرخا فى حصنها المنيع

فلم يغتر بقوته....... و لم تعلم لماذا حاصرو لماذا انسحب

فى يوم ما بعث لها رساله مفادها انه استكثر عليها هذه المدينه ان تغزى يوما

فلم يرد ان تكتب فى صفحات التاريخ انها يوما حدث بها شرخ و لو بسيط

وحدهما فقط كانا يعلمان

انه كان قاب قوسين من القدره على تخطى اول حصونها

ظلت المدينه شامخه فى كبرياء

إلا على عيونه كانت تدرى انها تغزوها كلما مر من امامها

2010-09-30T04:08:00.000-07:00

دائما ما وضعت قناعها بينها و بين الناس

دائما ما بحثت فيهم عن فارسها الذى يستطيع ان يمد يده و ينزع عنها قناعها

قد يظهر انه نزعه بالقوه

لكنها ارادت ان يكون هناك من يمتلك تلك الجرأه للقرب

لاقتحامها

لتكسير كل حصونها

تظهر عليها علامات الانزعاج

لكنها فى الحقيقه منزعجه لانها فقدت الامل ان يظهر من لا يهاب جمالها

ارادت ان ترى من هى تلك العيون التى تستطيع ان تنظر مباشره إلى عينيها

تلك النظره العميقه التى قالت كل الكلام دون ان تنطق

لم تكن تدرى ان اليوم موعدها مع تلك العيون

و لو علمت لهربت

فرغم رغبتها الجامحه .....بقدر ما ارادت ان تبتعد عن اسيرها

علمت انها سوف تسقط فى ارض المعركه دون مقاومه تذكر

بل سوف تتنازل له طواعيه عن كل اسلحتها

فقد ارادت ان تستسلم فليس هناك مكان لا للهروب و لا للمقاومه

فقد كان الوحيد الذى ازال قناعها

رمضان كريم

2010-08-09T05:57:00.000-07:00

كل سنه و انتوا طيبيين

التهمه """" بدون رجل """"

2010-05-04T07:23:00.000-07:00

مش عارفه ليه اليومين اللى فاتوا حصل انى سمعت اكتر من موضوع كانوا بطلاته بدون رجال
الظريف بقى ان اللى بدون رجل هيه متهمه
سواء كانت لم يسبق لها الزواج او كانت متزوجه و تطلقت او خلعت او ارمله

كنت بسمع اسامه منير رغم انى مش من محبيه بس كنت بعمل شويه حاجات منزليه فى الروقان بدون دوشه العيال
و مش عايزه تلفزيون المهم
لقيت واحده بتقوله انها مطلقه و بتحب جيد و خايفه
راح قالها حاجه و بخبره السنين طبعا و حاجه مش جديده مطلقا بس انا وقفت عندها
قالها ايه بقى حكيم زمانه
قالها خلى بالك لان الطمع فى المطلقه بيكون كبير
ان ان ان تششششششششششش

ليه بقى ان شاء الله الطمع فيها كبير نفس الكلام بيكون للارمله
ده على اساس ايه ان شاء الله ان اللى كان مانعها من الانحراف انها تتجوز و لما حصل و انها اتجوزت بقى سهل انها تغلط
و كأنها خلاص متسنيه الورقه العرفى بفارغ الصبر

فيه ايه يا بشر نفس البنى آدمه اللى كانت صاينه شرفها ما اتغيرتش
و مش هاتتغير لان اللى متربى كوبيس مش هايتغير بتغير الظروف

التحفه بقى ليه لو مطلق محش بيبصله انه سهل جدا يقع فى الخطيئه و كأن اللى هاتقع فى الخطيئه هي المرأه و ليس الرجل

الحكايه التانيه لواحده ما تزوجتش لغايه دلوقت بتقولى ان جارتها الجديده لما عرفت انها ما اتجوزتش ما بقتش حتى تسلم عليها
خايفه على بعلها طبعا
و كأن الاخ مش بيخرج فى الشارع و بيشوف ستات ممكن يكونوا احلى منها او حتى اوحش اللى طبعه يخون مش مستنى واحده ما اتجوزتش
قلتها فى كل الاحوال الناس بتقرف بعض اللى متجوزه بيخنقوها بالخلفه و اللى مش متجوزه بيخنقوها بالزواج

طيب يا بشر الراجل ليه ماحدش بيبصله نفس البصه اتجوز و لا لاء و لا طلق و لا ارمل
الاظرف من كده انه لو ارمل يقولوا اكيد هايتجوز و عادى
و لو ارمله و اتجوزت يبهدلوها خاينه العيش و الملح دى
و عجبى على مجتمع حرم و حلل على مزاجه
كلمه اخيره ماحدش يهتم بالدماغ المتخلفه اللى زى دى المهم انه عايش صح و مراعى دينه و اخلاقه
و على غرار جروب على الفيس بوك
بس ياسيدى و راحت مزغرته و عجبى

علشان تعرفوهم اوعوا تشجعوهم

2010-04-14T13:00:00.000-07:00

الناس القدام دول عمرهم ما قالوا كلام و طلع غلط
و اكيد كتير مننا عنده اقواله المأثوره
اللى ممكن تكون أثرت فى شخصيته
او بيطبقها فى حياته
انا ليه كتير اقوال مأثوره بحبها الصراحه
بس دلوقت فى بالى مقوله بتقول

قال أحد الحكماء لابنه : إذا أردت أن تصاحب رجلاً فأغضبه .. فإن أنصفك من نفسه فلا تدع صحبته . وإلا فاحذره

يمكن بقول فى الزمن ده صعب اوى اللى تلاقى حد ينصفك على نفسه
بس على الاقل مايكونش غضبه من النوع الطايش

بس اكيد لو لقيت اللى ينصفنى على نفسه مش ممكن اسيبه ابدا

و كمان حديث الرسول " آية المنافق ثلاث، إذا حدث كذب، وإذا وعد أخلف، وإذا اؤتمن خان"

و نفس الحديث بروايه عبد الله بن عمرو في الصحيحين أيضا فيه زيادة: "وإذا خاصم فجر، وإذا عاهد غدر، وإذا حدث كذب، وإذا وعد أخلف "

و دايما فى الغضب الناس بتبان على حقيقتها و بيبان معدنها

ساعتها بس بتعرف الناس دى تستاهل انك تعرفها و تأمن و انت معاهم

و لا تبعد عنهم و تشترى نفسك

و علشان حتى ما تتصدمش فى ناس فاكرهم انهم يستاهلوا انك حتى تضيع وقت من عمرك معاهم
مش كمان تتعلق بيهم و تزعل على عشره هو مش هايخاف عليها و لا هايعملها حساب

الناس دى اوعوا تشجعوهم زى ما بنعمل مع منتخبنا العظيم
و بالكيلوا متر ابعدوا عنهم
و ادينى عملت اللى عليه و ادتكم خلاصه خبراتى اللى ممكن اكون تعبت فيها
و عرفتكم ازاى تعرفوهم و اوعوا تشجعوهم

بيض

2010-04-02T17:38:00.000-07:00

شويه بيض بمناسبه شم النسيم علشان مابقاش حرمتكم من حاجه

حتى البيض حبتهولكم و بكل اشكاله

الناس اللى مش رديت عليهم البوست اللى فات

انا يادوب جالى الفرج قصدى الكمبيوتر و لازما و حتما هارد علشان انا مهتمه انى ارد على ناس معينه

بس الكمبيوتر ماكانش ساعف

و كمان البيض ده لو قعد اكتر من كده يبوض

طيب يرضيكوا

عيشوا مع البيض و كل شم و انتوا طيبين

اتعظوا يا رجاله من الراجل ده

2010-03-23T14:47:00.000-07:00

كان يا مكان
كان فيه راجل تعبان علشان بيشتغل كل يوم و زوجته جالسه فى المنزل
و كمان بتجيلها هدايا كتير فى عيد الام
قعد يصلى و يقول يارب تحس بالتعب اللى انا بتعبه
و قعد يقول ياربى انا بشتغل كل يوم 8ساعات
انا عايزها بكره تصحى و تبقى راجل علشان تحس باللى بحس بيه

تحقق دعائه
و صحى الصبح لقى نفسه امرأه
جهزت الفطار للزوج و الاطفال
جهزت الاطفال للمدرسه و اكلتهم فطارهم
جهزتهم الغدا وصلت الاطفال المدرسه رجعت البيت و جهزت الهدوم للتنظيف
جهزت الملابس للتنظيف الجاف و عدت على البنك تسحب فلوس
ذهبت للتسوق ثم رجعت للبيت علشان تضع المشتروات
دفعت الفواتير
نظفت القط و الكلب
هنا كانت الساعه واحده ظهرا جرت توضب السرير
غسلت الملابس
نظفت الشقه
جرت على المدرسه تجيب الاطفال و طبعا جادلت معاهم فى طريق العوده للبيت
حتطلهم اللبن و الكويكز
ذاكرت معهم دروسهم
بدأت تكوى الملابس و هيه بتتفرج على التلفزيون
الساعه 4ونص بدأت تحضر للعشا
و تنظف المطبخ و تحط الاطباق فى غساله الاطباق ده للى عندهم غساله اطباق يعنى
اخدت الاطفال للاستحمام و حتيطهم فى السرير
رجع هو عشته و جرت على السرير و إن كانت كل حاجات البيت لم تنتهى
صحت تانى يوم الصبح
ركعت و قال يارب انا ماكنتش عارف انا كنت بفكر ازاى ازاى كنت بحسد مراتى على هدايا عيد الام

يارب ارجع راجل تانى ؟؟؟؟؟؟؟؟؟؟
بس ياترى عرف يرجع تانى رجل ؟؟؟

تسمحيلى بالرقصه دى

2010-03-15T18:28:00.000-07:00

كم كانت تحب سماع هذه الجمله فى كل فيلم كانت بتتفرج عليه

كانت تسرح فى يوم تسمع فيه " تسمحيلى بالرقصه دى "

عاشت فى حلم جميل ... و فى كل يوم كانت على قناعه ان اليوم سوف يكون هو اليوم الذى تسمع جملتها

كانت اليوم على الشاطى وحدها

لم تكن تعرف انه يراقبها و شعرها يرفرف على كتفها

كانت هناك موسيقى رقيقه و كانت معها مغمضه عينيها

و متخيله ان لو جاء هذا الغامض و قال لها ..............!

لم تكد تدخل فى حلمها حتى سمعت صوته يأتى لها

" تسمحيلى بالرقصه دى "

لم تصدق نفسها هل دخلت فى الحلم و صارت تتخيل انه اصبح حقيقه

لم تفتح عينها ظنا منها انه حلم

إلا انها سمعت صوته مره اخرى ففتحت عينها و لم تنطق بكلمه

فقط رقصت معه كما تخيلت طول عمرها

لم تغمض عينها هذه المره فقد كانت تستمتع بنظره عينه الحانيه

مالت بين يديه إلى الخلف و كانت على علم انه لن يسقطها

لم تعرف كيف جاء لها كل هذه الثقه فيه فقط اسلملت نفسها إلى احساسها به

جذبها إليه قبل ان تسقط

لفت حول نفسها و هو ممسك بيديها

و كانت فى كل لفه تنتظر اللحظه التى تتلاقى فيها عيونهم

سكتت الموسيقى

فنظر إلى عينيها مباشره

و قال لها احبـــــــــــــــــــك

هنا فقط اغمضت عيونها مره اخرى

خدوا دى

2010-03-09T01:20:00.000-08:00

اولا هارد على كل الناس الجميله الى هنتنى بعيد ميلاد النونات

ثانيا فيه كاتب اسمه جورج كوفى حاجه كده آخر حلاوه و الله عامل سلسله كتب رائعه

ثاليا الاغنيه دى بحبها اوى
و رغم انى مش بحب النوع ده من الحب اللى هو بلا امل
بس الاغنيه رائعه

و اخيرا صباح الفل

و مش عندى شاشه علشان ارد ولا ادخل اعلق عند اى حد

ادعولى اجيب شاشه

قولوا يارب تنجح يا تتح

قصدى يارب اجيب شاشه

رسائل خاصه جدا

2010-02-25T03:32:00.000-08:00

يا صباح الفل يا احلى مدونين فى الدنيا
النهارده انا عندى مناسبه خاصه جدا
النهارده عيد ميلاد احلى بنتين

مــــــــــــــيار هانم و روشــــــــــــــان هانم

كان نفسى اصورهم زى السنه اللى فاتت
راجع الكتاب ص
خـــــــــــــــــراشوف
(:
بس موش لحقت بس ان شاء الله هاصورهم و ابقى احط صور اجمل بنتين فى الدنيا
مين يشهد للعروسه بقى
نفسى اشوفكم احلى عروستين فى الدنيا
مع ناس تقدركم و تحترمكم
اصلى تعبت فيهم و الله (:

اه ساعات بتاخدنى الجلاله و اقول مين ده اللى يستاهل القمرتين دول
و ده احساس اى ام عادى يعنى انا مش حاجه غريبه علشان محدش يتريق
نفسى تعرفوا انى نفسى ادخل الجنه بتربيتى ليكم
و نفسى اشوفكم كما يحب الله و رسوله
و نفسى تعرفوا انكم ما تطلعتوش بالساهل
مش هاقولكم احساس تربيه التوأم ايه
حاجه آخر حلاوه و الله
مش عارفه انا بقولكم كل سنه و انتوا طيبيين و لا بسيحلكم فى المنطقه
علشان انتوا فى نفس ذات اللحظه جايبيين كل مخدات الشقه و حاطنهالى فى الارض

حاجه اخيره و مره من نفسى بقى
زوجى الغالى
فى عيد ميلاد بناتنا
ربنا يخليك ليهم و ليه
و ربنا يحفظك من كل شر

هيصه رسايل خاصه جدا
بس مسيرهم لما يكبروا اوريهالهم و يمكن تعجبهم

اخيرا شكر خاص ل كلمات من نور على تصحيح صوره البوست اللى فات

عمرنا ما هانعجبكم يا رجاله

2010-02-23T11:45:00.000-08:00

آل بيتريقوا علينا آل
و بيقولوا ان ده الفرق بين تفكير المرأه و الرجل
فى الأجابه على سؤال بسيط
تحبى نروح نسهر
ــــــــــــــــــــــــــــــــــــــــــــــــــــــــــــــــــــــــــــ

عمرنا ما هانعجبكم يا رجاله

غريبه انا

2010-02-08T16:08:00.000-08:00

من كام يوم اتسرقت شنطه خالتى

عادى و بتحصل و كتير دلوقت

اى ما كان اللى فى الشنطه مش هو ده سبب اللى هاتكلم عليه

انا بقى عندى نقص رهيب فى الاحساس بالامان

فين بقى بلد الامن و الامان بتاعه زمان و لا حسدنا نفسنا

زمان لما كنت بخرج لصاحبتى اللى فى العماره اللى امامى

كانت ماما تقف فى البلكونه علشان تطمأن انى رحت عندها سليمه

و انا نازله من عندها ارن عليها علشان برضوا تقفلى فى البلكون زى تعليماتها

كنت ساعات كتير بتحنق و اقول ايه اللى هايحصل فى الكام ثانيه دول

ده اصلا غير انى لما كنت ببقى عايزه اخرج مع اصحابى كان فى الغالب الاعم بابا مش بيوافق

و لما كنت ازعل كان بيقولى

لو انتى عندك جوهره ثمينه هاتشيليها فى علبه قطيفه و لا هاترميها فى الارض

كنت بقوله هاشيها طبعا فا يقولى انتى الجوهره بتاعتى و انا بحافظ عليها

فأسكت و انا زعلانه برضوا لكن شويه مقتنعه... بس برضوا كنت بقول يعنى صاحباتى اباهاتهم مش بيخافوا عليهم ؟

بس لما ازن زياده كانت الاوامر العسكريه تصدر بعدم الخروج و مش هاقولكم على التربيه العسكريه بتكون عامله ازاى

المهم ان الحاجات دى انا كنت بتضايق منها خوف ماما و قلق بابا

دلوقت بقى انا كنت خارجه

و بسبب السرقات الرهيبه فى الوقت الحالى بقيت امشى و انا خايفه جدا

بقيت حاسه انى عامله زى النسر اللى ماشى و اولاده تحت جناحه و متأهب لاى خطر

بقيت خايفه من الناس الفقيره و خايفه عليهم

نفسى الاقى الناس ليها حد ادنى من المعيشه تخليهم ما بفقدوش اداميتهم

بلدنا غنيه مش فقيره بس الناس تعبانه و كله بيقطع فى كله

بس فى لحظه سرحت و قلت لايمكن اخلى الجواهر بتاعتى تخرج لوحدها

غريبه انا اللى كان بيخنقنى فجأه لقيتنى بفكر فى انى هاعمله

يمكن يتخقوا منى بس الاكيد انهم هاييجوا عليهم يوم يوصلوا لحالتى ساعتها

هايقولوا كان عندها حق ماما

زى ما انا بقول كان عندهم حق

خلص الكلام سلام

ــــــــــــــــــــــــــــــــــــــــــــــــــــــــــــــــــــ

نداء إلى

وندا لو سحمت غيرى طريقه التعليق عندك فى المدونه مش عارفه ادخل اعلق عندك

لوك لوك لوك لوك

2010-02-01T09:01:00.000-08:00

عايزه ارغى حد عنده مانع

مره من نفسى انا اصلا مش برغى كتير و اللى متابع عارف علشان كده هارغى

اولا عايزه اتكلم عل الناس اللى بتسوق بسرعه ................. بكرهكم

من يومين تقريبا 4 اتوبيسات اتقلبوا جنوب سينا و على فكره ما خبطوش فى بعض

لا الصراحه عملو اللى عليهم كل واحد اتقلب لوحده

و التقرير بتقول السرعه و كمان بتقول فيه ناس حاله خطره و مش مهم الناس المهم انهم يجروا

عايزه افهم ليه مافيش رقابه على السواقين دول

ليه السواق اللى بيمشى بسرعه

لو رجع بالناس الشركات مش بتسأل الناس عن اداء السواق ده

لانه لو حس انه حد هايدور وراه هايخاف على نفسه علشان هو مش خايف على ارواح الناس

********************************

كنت فى مكان و صادف ان فيه اجانب

اكتر حاجه لفتت نظرى ايه

ان الناس دى اى ما كان سنها بتعمل اللى هيه عايزاه

اه مش كله صح بس مثلا

تلاقى اتنين عواجيز جدا و ماشيين مع بعض و ماسكين ادين بعض ايه حاجه كده تفرح

طيب هاتوا اتنين عرب فى الغالب هاتلاقى كل واحد ماشى بعيد عن التانى لانه عيب يمشوا جنب بعض مش كمان ماسكين ادين بعض

ليه بنتكسف من ازواجنا و كأنها تهمه بنبعدها عننا

و اللى يمشى ماسك ايد مراته الناس تقول ده مراته ممشياه

و اللى يمشى ماسك ايد واحده يبقى اكيد ماشى معاها مش مراته

*****************************

اللى بيكتب بغير معرف اكتشفت انهم ينقسموا إلى

حد مستخبى من موضوع حاسس انه عيب انه يرد عليه بأسمه

حد مستخبى و نفسه يشتم و عامل بلوج تانى و طالع فيه ايه آخر رقه

حد نفسه يغلس على مدون و يعكنن عليه و بس

حد عايز يعاكس واحده و يشاغلها

حد عبيط و بشتم فى الاديان

عايزه اقول لكل حد غير معرف ياريت تحس بأنك لما بترد على حد بشتيمه او بغلاسه

فاهايرد عليك بنفس الطريقه فى الغالب لا هايمسح التعليق السخيف

و فى النهايه لو ردد عليك هاتكون الكلمه لفت و رجعتلك

احنا هنا مش علشان نغلس على بعض

اللى مش عجبه حد ما يدخلش عنده و بس

خلص الكلام سلام

سندريلا مهزومه

2010-01-27T10:58:00.000-08:00

لم تعرف طول عمرها معنى الهزيمه و لم تكن فى قاموس لغتها

لم تكن يوما غير واحده من الذين يشار إليهم دائما

و لم تحلم يوما إلا بفارس يخطفها على حصان ابيض

فما الفرق بينها و بين سندريلا

لم تكن ترى نفسها إلا سندريلا عصرها لم يكن غرور و لكن كانت ترى نفسها سندريلا

ايام طويله عاشت تحلم بالامير الفارس المغوار

ايام عاشت تحلم كيف تسعده و ترسم صور لحياتها معه

كم حلمت احلام ورديه ... كم حلمت بيوم تكون فيه مع الامير فى القصر الجميل

كان القصر جميل لانه فيه و لانها فيه

الان لم يبقى من حلمها شيئ

لم تعد سندريلا .............. فقد كانت تحلم بعيون يشع منها الحب

الان لم يعد يراها الامير إلا نادرا حتى لو كانت طول الوقت امامه لم يعد يراها

تعد له الطعام و تضعه فينظر لها دون ادنى اهتمام

مال لهذا الامير لا يراها

اكانت فعلا سندريلا ام ضحكت عليها المرايه

دور بنفسك

2010-01-17T09:52:00.000-08:00

ده إهداء لكل و علشان ما يألدش حد تانى علشان هايطلع نسخه مشوشه

صوره تحميضها وحش

http://www.youtube.com/watch?v=rqSGHQFzU4s

تحديث صغنون عندما تكون الخيانه اسهل الحلول

2010-01-10T15:46:00.000-08:00

سقط سهوا

زى الجرايد بالضبط

مــــــــــــــايكل

كل سنه و انت طيب يا عميد و بجد بتضحكنى جدا

***********************************

لو حصل و فيه واحد او واحده سمح لنفسه انه يحب

فاهايكون ادامه 3 حلول

1 - انه يسيب شريك حياته و يرتبط بالشخص اللى بيحبه

و ده فى غالب الاحيان بيفشل فشل زريع

ده غير تشرد الاطفال و كمان المحاكم و ما ادراكم ما المحاكم

2- انه يسيب المحبوب و ده لو كان عاقل شويه و مش عايز يدخل فى طلاق و تشريد اولاد

و امكانيات فتح بيت تانى و مشاكل للصبح

3- انه يخون و فيه ناس فاكره ان دى اسهل حاجه

لانه و لا اولاد هاتتشرد و لا بيت هايتقفل ولا شريك حياه مغفل و مش عارف و فى نفس الوقت مش هايدخل فى الغالب فى طلاق و نفقه

لانها نزوه و راحت

بس هو فعلا النزوات بتروح ؟؟؟؟؟؟؟؟؟؟؟ هل لما حد بيحب و هو فى داخل العلاقه الزوجيه مش بيسيب اثر فى النفس

اظن ان ده مش هايحصل لانه اكيد كان يتمنى انه يعيش مع المحبوب لانه اكيد لقى فيه حاجه مش موجوده فى الشريك

متهيألى ان فيه حل رابع و هو اسلم الحلول ان الواحد يقفل باب قلبه على شريك حياته

و لو قفل الباب اللى بييجى منه الريح هايسده و يستريح

و دايما يحاول يشوف ايه اللى فى شريك الحياه مش موجود فى المحبوب

ــــــــــــــــــــــــــــــــــــــــــــــــــــــــــــــــــــــــ

كلمتين على جنب

ستوته كل سنه و انتى طيبه

الاستاذ بيرم المصرى ربنا يديك الصحه و تمتعنا دايما بكلامك

دكتور احوال الهوى بحب جدا مداخلاتك

صيدلانيه بجد نفسى اشوفك جداااااااااااا

روفى بحب هدوئك اوى و كلامك اللى بيدخل القلب

محمد و هل تبحث عن السعاده روحك نقيه اوى

مفروسه انتى من الشخصيات المميزه جدا

عمرو حبشتكانات فلسفيه مفتقدينك جدا

شموسه حمدله على السلامه و ماتغيبيش تانى

كل المدونين بجد بتوحشونى و بجد بستفيد جدا من ناس كتير منكم

انا حذرتكم يا رجاله

2009-11-22T09:37:00.000-08:00

من زمان و من فتره طويله
ده على اساس انى عندى 99 سنه
حذت و قلت للرجاله خلو بالكم
قولوا للستات كلام حلو و ان لو مش سمعت من جوه هاتسمع من بره
و لا حد سمع كلامى
و طلعت انا صح
الدليل بقى مش قالولوا
الدليل القصه اللى كانت مكتوبه فى بريد الجمعه من اسبوعين كده و الردود اللى كانت عليها
القصه كانت عن واحده خانت جوزها علشان مش بيقولها كلام حلو و مش مهتم بنضافته الشخصيه
و رغم المميزات اللى انا متخيله انها ممكن تكون فيه
هيه ما قدرتش تتغاضى عن احتياجاتها النفسيه فسمعت بره
و كانت الوقعه
طبعا زى ما قلت مافيش مبرر للخيانه
بس ليه الراجل لما يخون يقول اصل مراتى مش مهتمه بنفسها و احتياجاته النفسيه مش عارف ايه
و نسامحه و لو الست عملت كده يبقى نعلقلها المشانق
لو عدينا غلطه الراجل نعدى غلطه الست
مش بصادر طبعا على حق الراجل فى الزواج من اخرى
بس متهيألى ان كله بيستسهل و يعك
اللى خلانى اكتب ان الردود على الموضوع من سيدات اوشكوا على الخطيئه او وقعوا فيها
زى ما يارجاله عايزين الواحده دايما متهيألكم انتوا كمان اتهيأولهم
مش بس انك تهتم بالنظافه
لاء كمان انك تسمعها كلمتين حلوين
هيه محتاجاهم علشان تقاوم لو هيه مش عندها المقاومه الذاتيه
المقاومه هاتكون لذئب قاعد مستنى الفريسه
و ما اكترهم
زى ما انت المفروض هيه تكون عفتك انت كمان كون عفتها
و خلص الكلام سلام

إمرأه واحده لا تكفى !!!!!! ولا راجل واحد ايضا

2009-10-19T17:17:00.000-07:00

مقوله شهيره جدا لدى الرجال

إمرأه واحده لا تكفى

و رغم انى مش عارفه ايه موش بتكفى ايه بالظبط

علشان انا بحس ان الرجل الشرقى واخد حقه تالت و متلت

بمعنى

بييجى من الشغل يلاقى بيته نظيف و عياله زى الفل و اكله جاهز

ياكل و ينام و يصحى ياكل و يروح الشغل

يعنى كل اللى بيعمله انه بياكل و يروح الشغل

مافيش مسؤليات بيت عليه

إلا ما ندر علشان الظلم وحش

يعنى الست هيه اللى شايله البيت من بابه زى ما بيقولوا

غيره بقى فى اوربا و الدول المتقدمه بييجى يغسل مواعين و بنظف زيه زيها

و ماحدش بينظف ورا سياته هو اللى بيشيل زبالته

رغم كده رجلنا الشرقى بكل مميزاته شايف ان امرأه واحده لا تكفى

طيب انا كمان و رغم انى مش بحب مبدأ المساواه لانى بحس اننا برضوا متدلعين عندهم

و عليه ممكن الستات كمان يطالبوا بنفس المبدأ

رجل واحد لا يكفى

راجل يسمع وقت ما نكون عايزيين نتسمع

راجل يخرجنا و يفسحنا

راجل ياخد بكلامنا و مايرمهوش ورى ظهره

الطلبات كتير و كل واحده و العدد اللى هيه عايزاه

و من هنا بأطالب و اشدد ان يكون شعار الرجال و النساء

لا اريد من الدنيا إلا واحد يكون هو كل الرجال و اكون انا له كل النساء

محدش هايقدر يطول كل الستات و لا ست هتاخد كل مميزات الرجاله

بس على الاقل كل واحد يحاول يكون كل الرجال و كل السيدات للاخر

و كفايه شعارات بقى

اتجوز اللى ما تقدرش تعيش من غيرها او من غيره

2009-09-24T17:12:00.000-07:00

مقوله سمعتها و عجبتنى جداااااا

ما تتجوزش اللى تقدر تعييش معاها اتجوز اللى ما تقدرش تعيش من غيرها

و مش عارفه ليه الناس بعد الجواز تكتشف انها ما اختارتش الحاجات اللى هيه تقدر حتى تعيش معاها

طيب مهو كان فى ايديكم انكم تختاروا اللى انتوا عايزينه بس ساعتها فكرت فى حاجات بعيده تماما عن احتياجاتك

على سبيل المثال

لما واحد بيتقدم لواحده بيكون كل المعلومات المتاحه عنه هيه ايه ؟؟؟؟

وظيفته هو و اهله و حالتهم الماديه و هايقدر يجيب شبكه بكام و عنده شقه و لا لاء

اما المعلومات المتاحه عن العروسه ايه بقى ؟؟

ياترى حلوه و لا لاء

طلباتهم كتيره و لا ايه

بتشتغل ؟؟؟؟؟

اهلها وضعهم ايه ؟

و بمجرد ان يتم الموافقه على الطلبات الموضوعيه ننتقل إلى الشبكه و تمنها كام و هانعمل الخطوبه فين ؟

و بعد الخطوبه و الذى منه يكون التجهيز للفرح من جهاز و الذى منه

و ده حتى قبل ما يكونوا فكروا همه عارفين يتفاهموا و لا لاء

و بتكون فتره الخطوبه بدل ما هيه فتره تعارف تتقلب إلى فتره تجهيز

و فجأه يتجوزا و يبدأوا يعرفوا بعض

و يا إما نفع ....يا إما لاء ......او تبقى اهى عيشه و السلام

و فى الاخر نقول ليه نسب الطلاق بقت كتيره

علشان احنا ما اتجوزناش غير وظيفه و شقه و جمال و شبكه

ماوقفناش كتير ادام الشخص و اخلاقه و طباعه و قلنا حتى لو بتاع بنات مسيره يبقى كويس

و تغاضينا عن حاجات كتير علشان نتجوز و السلام

ما حدش فكر انها هاتبقى عمر بيضيع

و احتياجات نفسيه

و عيال هاتروح فى الرجلين

المهم الافلات من لقب عانس و المهم تكمل نص دينك و السلام

محدش ضد الجواز و لا هو وحش و لا حاجه

بس محتاج شويه ذكاء من الطرفين علشان ما يلاقوش نفسهم

مخيرين بين حلول كلها وحشه

و دمتم هانئين

كلك امكانيات و جريئه يبقى عليكى العين و الطلب

2009-08-05T10:06:00.000-07:00

يمكن دايما بتكون دماغى مليانه افكار ممكن تتكتب بس ساعه ما اجى على الكمبيوتر

كله يتمسح مش عارفه ليه

بس اللى فى دماغى دلوقت اعلان لسه حالا شايفاه على النت

و نص الاعلان كالآتى

"""""""""""""""""""""""""""""

مطلوب فورامضيفااااااات ارضي جريئاااااات لمحلات ومطاعم سياحيه ود يسكوووو بااااار و ملهي ليلي حسنه المظهر لبقااااااات دلوعاااااااات غير محجباااااات للعمل بالاسكندريه ويوجد سكن للمغتربات براتب يبدا من 2000 جنيه شهريا للتواصل برجاء ارسال السيره الذاتيه علي الايميل ...................... وفرصه للترقي لمن تتفهم العمل جيدااااا وللسفر لدول الخليج

"""""""""""""""""""""""""""""""""""

طيب ما البلد مليانه شغل اهه امال مالكم يا شاب مصر

لاء صحيح مش عايزين شباب

العين و النيه على الشابات

بلا قرف

ــــــــــــــــــــــــــــــــــــــــــــــــــــــــــــــــــــــــــــــــــــــــــ

ااااااااه افتكرت حاجه من اللى كان نفسى اتكلم عليها

خير اللهم اجعله خير

و انا قاعده كده سرحت و افتكرت انى و انا صغيره كان نفسى اوى اكون عصفوره

و ماحدش يضحك

ليه بقى ؟؟؟؟؟؟؟؟

علشان كان نفسى اوى اطير فى السما من غير طياره

و كمان و رغم صغر سنى

كنت دايما بخاف ادخل النار

و كنت بقول لو كنت عصفوره ما كونتش هادخل النار

ر غم انى خلاص كبرت لكن دايما جوايا انى كان نفسى اكون عصفوره

السؤال للى عايز يرد عليه

ياترى كان نفسك تكون شخصيه كرتون او طائر او اسد مثلا او شخصيه معروفه ؟؟؟؟ ياريت اعرف و ليه

ـــــــــــــــــــــــــــــــــــــــــــــــــــــــــــــــــــ

حاجه كده على الماشى

روشان بنتى يادوب بتتكلم بالعافيه هيه و ميار

و الحمد لله بيعلموا بعض الكلام بس مع الاسف غلط

مسميين اللبن ....... لاالاا

حد عرف ينطقها هههههههههههه

اشك

و القلم بقى ايه اصلهم عيال ايه عباقره و اقلام و ابحاث

القلم اسمه............ ابريم

مش عارفه جات منين و الله و مهما اقول قلم يقولو ابريم

ربنا يهديهم

حزروا فزروا ( فزوره بجنيه )

2009-07-18T17:45:00.000-07:00

طيب احكموا انتوا و قولولى

انا مش هاتكلم خالص مالص المره دى

تدوله كام سنه

مش سجن طبعا بس عمر

تخيلوا عنده كام سنه

اللى هايجاوب صح هاعمله فطيره تفاح بعملها هايله

طيب مش هاحيركم عنده 26 سنه تخيلوا

انا اديله حاجه و اربعين و هو فعلا كده من اللى شافه

ابوه طرده و هو 6 سنين و سرح على الارصفه علشان يأكل نفسه

و الله اعلم ايه اللى شافه لغايه دلوقت

المهم انه لما جه يطلع بطاقه كان لازم ابوه يعترف بيه علشان يعمل بطاقه ساقط قيد

ابوه طلب 10 الاف جنيه علشان يرضى يعترف بيه

مش هاقول غير حسبى الله و نعم الوكيل فى اللى بيحصل ده

اكيد ما يرضيش ربنا

و عرفت دلوقت ليه هو شكله يدى اربعين و هو فى العشرين من اللى شايفه

ربنا يستر من اللى جاى و افرجها علينا يارب و ارفع الظلم عن الغلابه

كلام فى الاباحه

2009-07-12T16:00:00.000-07:00

طبعا الجواب واضح من عنوانه

مش محتاج شرح و لا حاجه

الكلام عن الاباحه

اى الكلام العيب اللى مش المفروض انه يكون كده العادى بتاعنا

طيب ايه اللى حصل

احنا بنتعامل على اساس تكلم فى الاباحه تكن مشهور و لا ايه

الاقى الافلام كلها كلام مش مظبوط و يقولو ابداع ايه الابداع فى الاسفاف

نجيب اسوأ ما فى المجتمع و نقول دى الحقيقه و كأنها منتشره فى كل البلد

و هو مايكون يعملها غير فئه صغيره و الكلام على اخر افلام خالد يوسف و مش هاقول غير كده علشان عيب

مفيش فيه حاجه حلوه نسلط الضوء عليها يبقى الكلام يا اما على العيب يا اما ضحك و تهييس يا قتل يا اما ارهاب

و يبقى كل من هو بيصلى

بلاش مافيش قصص حب حلوه و جميله إلا حتى يوم ما يعملوها نلاقى عمر و سلمى ؟؟؟؟ يعععععععععععع الصراحه

مافيش خيال علمى كده زى اللى بنشوفه فى بلاد الفرنجه اللى بيخلى الواحد متنح ادم الفيلم من عير و لا عيب و لا حاجه

بلاش ننشر غسينا اللى موش نضيف ( كلمه عيب ) علشان الناس اخدت عننا فكره زى الزفت

و دمتم سالمين و بلاش افلام عربى و لا اجنبى بلا حرقه دم

موقف غريب شوفته بعينى

2009-06-18T17:54:00.000-07:00

النهارده كنت فى النادى و مش عارفه ليه انا بشوف حاجات غريبه هناك
الناس فعلا اتغيرت

لقيت واحده ماسكه ولد صغير و لويه دراعه و عماله تشد فى ودانه و تضربه على وشه بالقلم

انا فى الاول قلت يمكن مامته بس شكلها مش مامته

بس رجعت و قلت لاء مش ممكن تكون مامته و بتضربه كل ده قلبها مش هايطاوعها

استنى تسكت مش بتسكت

الدم غلى فى عروقى و اتغاظت جدا خصوصا انى كنت متأكده انها مش مامته

رحت رايحاها و قلتلها انتى مامته ؟

بصتلى و قالت لاء و انتى بتسألى ليه

حسيت طبعا انها ماتوقعتش ان حد يسأل على الولد اللى هارياه ضرب ده

قلتلها انتى مشرفه عليه يعنى ؟

قالتلى اه

قلتلها لو مامته شافتك و انتى بتعملى كده ماكانتش سابتك على فكره

قالتلى و بمنتهى البجاحه هيه قايلالى اعمل كده ؟؟؟؟؟؟؟

و هاخليكى تكلميها و هيه تقولك ؟

و راحت واخده الولد و بتجرى بعيد علشان ما اردش عليها

قلتلها اه هاكلمها و اقولها و رحت بصيت للولد و قلتله ماتخليش حد يضربك كده

فضلت متابعاها بعد كده لانها كانت قاعده فى المكان نفسه

لقتها بتتعامل مع الولد بعد كده منتهى الرقه ؟؟؟؟ تخيلوااااااااااااااااااااااااااااااااااااااااااااا

مشيت من المكان و رحت مكان تانى انا و صاحبتى اللى كانت معايا و نسيت الموضوع

بعدها لقيت الولد جيلى بيقولى يا طنط هو انتى اسمك ايه ؟

قلتله ليه ؟

قالى ناديه عايزه تعرف اسمك ؟ قلتله ناديه مين قالى اختى

قلتله مش شكلها اختك قالى دى الشغاله بس ماما قالتلى مش نقول عليها كده

قلتله خلاص انت لما تروح لماما تقولها انها كانت بتضربك فى النادى خلاص قالى حاضر

بس ماما قالتلها تعمل كده

مصيييييييييييييييييبه اكبر

استغربت جدا انها كانت عايزه تعرف اسمى و ما فهمتش ليه اصلا هيه عايزه تعرفه ليه

و استغربت اكتر كل الناس اللى كانت واقفه و شايفه الولد بيتضرب و محدش قالها بتعملى ايه ؟

استغربت جدا الام اللى قاعده فى البيت او حتى بتشتغل و سايبه تربيه العيال على الخدامه

مستنيه منها تعلمه ايه ؟

تعوده انه يتضرب ادام الناس و اصحابه لانهم كانوا واقفين

و لا ايه هاتكون نفسيته

عرفت دلوقت ليه فيه مدرس ممكن يعمل عاهه مستديمه لطفل عنده او حتى يموته علشان ما كتبش الواجب

اكيد اكيد اكييييييييييييييييييييد مالقاش حد يقوله انت غلط و هاشتكيك

هيه خافت لا اقول لمامه الولد فعلا و انا عارفه انها اكيد اكدت عليه انه مش يقول لمامته على اللى بتعمله

يمكن الام ماتستاهلش ان حد يحمى عيالها و هيه مش حمايتهم

بس اكيد الولد يستاهل لانى كلمته و لقيته قمه فى الادب مش من العيال السافله

و دول كتير على فكره

انا مش حشريه خالص و الله بس مش بحب نشوف الغلط و نعمل نفسنا مش شايفينه

و تخيلت ان لو ده ابنى كنت اكلتها و الله ماكانش هايكفينى عمرها كله لمجرد انها ضربته بس

لكل ام مسؤليتك الاولى و الاخيره فى الدنيا هيه اولادك اوعى يغيبوا عن عنيكى فى كل مراحل حياتهم

لانهم محتاجينك اكتر من الفلوس و اكتر من الخدامه اكيد

اوعى تكونى متطمنه لمجرد انهم مع الخدامه

او حتى احد اقاربك

دائما كونى موجوده دى شغلتك و همك و اللى هاتتحاسبى عليه

اعلان لوكس و عيد ميلادى انا و صيدلانيه

2009-06-15T17:21:00.000-07:00

يوم 1/6 كان عيد ميلاد احلى صيدلانيه على البوجر
و يوم 14/6 كان عيد ميلادى انا

و احلى مفجأه

ان صيدلانيه صاحبه مدونه صيدلانيه طالعه نازله

كلتنى مرتين

اول مره رغينا و قفلنا و لاقتها بتتصل تانى

بصراحه اتخضيت ايه ياترى فيه ايه

رديت لاقيتها بتقولى كل سنه و انتى طيبه

فرحت جدااااااااااااااااا انها افتكرت عيد ميلادى

قولتلها عرفتى منين قالتى انى كنت قلتلها لما كانت بتعزينى فى حماتى

مش بقولكم بنت آخر مجدعه و زوق

بتقولى عملتى ايه فى عيد ميلادك قلتلها كنت بتفرج على اعلان لوكس

و الاعلان عباره عن واحده بتتيجى من بره

تلاقى جوزها و بنتها مستنينها

و تلاقيه عاملها عشا و ورد و حاجات كده تحفه

اووووووووووم انا ايه بصيت للباشمهندس بصه شذرا من النوع الشرير

فا ياحرام بيقولى ايه مالك

قولتله اكيد عيد ميلادها النهارده

ههههههههههههههههههههههههههههههه

ياحرام صعب عليه علشان هو مش مقصر بس انا اللى شريره

تفتكروا لو كنت جبت لوكس كنت هالاقى الورد و العشا

حكتلها و قعدنا نضحك

انا و هيه على فكره عملنا مدونتنا فى وقت قريب جدا من بعض يمكن مسأله ايام

مش عارفه مين قبل التانى

شوفت المدونه بتاعتها عند مدونه عايزه اتجوز

و سبحان الله كانت من اوائل الناس اللى اتعرفت عليها و اتعلقت بيها

يمكن علشان جوزاء زيى و كمان من اسيوط يعنى بلديات حاجات كتير بتجمعنى بيها ماكوناش نعرفها

إلا لما حكينا كتير مع بعض

بقولها كل سنه و انتى طيبه

و حكى يا قطه على عيد ميلادك مش هاحكى انا بلاش تسييح

هههههههههههههههههههه ضحكه شريره برضوا

مشكله و ارجوا المشاركه

2009-06-12T16:47:00.000-07:00

السلام عليكم طيب بما انك خبرة في حل العقد والمشاكل الزوجية
هاقلك مشكلة انا انسانة صريحة جدا وطبعي غريب شوية بالنسبة للحياة المحيطة
ودائما موضع نقد من اهل زوجي
يعني اخر موقف ان اخو زوجي برن الجرس راح فتحلي الباب سوري ب الطقم الداخلي غضت نظري وتركت الحاجة علي الباب وانا نزلة السلم قولتله لو سمحت ما تبقاش تخرج لي كدة تاني ليه وليه راح قال لزوجي واهلو كلهم

واتسبب في خناقة بيني وبينه عشان كنت عايزة اخرج واخد ابني معايا وهو عايز يخده معاه طيب هو ابني ولا ابنك انت يدوبك عمه افتكر اننا وخداها عند ومش عايزة اعطيه ابني وراح مزعق وزوجي زعقلي وكنت هاسيب البيت

انا مش عارفة اخلي زوجي يعملني كويس بعيد عن اخواته يارب يموته كلهم بس مش عارفة هو بيعمل معايا كده ليه ادمهم اكيد بيقللو اكلام عليا مش صح وبيقوموا عليا وهو بيخزن لحد مينفجر فيا

قوليلي بقي يا خبرة اعمل ايه علي فكرة بعيد عنهم هو بيعاملي كويس جدا بس حسة اني فقدت احترامه ليا ونفسى اسيبه مش هاقدر انا بكرهم

انا بكلم وخلاص بس بردة ردي عليا وهاتبعك
تحياتي علي فكرة محتاجة اغظهم ومش بعرف اعامل الناس زي معملتهم

طبعا بسسب الكلمة ديه الكل هايقطعني
ابقي انصحي الناس اللي بيكلموكي ميبقوش يتزوجوا في بيت عايلة

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

اولا احب اقولك انك كنتى سبب انى ارجع اكتب تانى و ده علشان انا كان عندى ظرف وفاه حماتى رحمها الله

و بعدها فقدت الرغبه على الكتابه و انتى طلعتينى منها

بصى يا ستى انا رأيى ليكى يتلخص فى ان اى راجل مش بيحب مراته تبان ادام اهله انها المتحكمه فيه

و ده مهم جدااااااااااااااااااااا و يمكن ده اللى بيفسر ليه هو ادامهم مش زى من وراهم

كمان عايزه اقولك انك واضح انك ساكنه فى بيت عيله و ده ليها مميزاتها و عيوبها

بس محتاجه شويه ليونه زى ما بيقولوا

يعنى يا ستى حتى لو اخوه فتحلك و هو مش جاهز انه يفتح الباب

تسيبى الحاجه على الباب و تنزلى تقولى لجوزك و هو اللى يلفت نظر اخوه مش انتى

او حتى يقول لمامته او احته تنبه اخوه

و لو مش حصل ده ماتوصليش انتى اى حاجه و قوليله روح انت و ساعتها مش هايقدر يفتح بقه

هو عارف ان اخوه غلطان بس مش هاقولك ده علشان مايصغرش بيه

الليووووونه

لما بقى لو عايز ياخد الولد ياستى سبيه و تعالى على نفسك

حتى لو هو عايز يغيظك غظيه انتى و سيبوهوله و مش هايقولك تانى هاتيه لان اكيد الولد هايتعبه برضوا

خلى بالك انك لو لسه مستجده عليهم فأنتى بالنسبالهم مبهمه و انتى اللى داخله عليهم و عايزين يفرضوا عليكى رأيهم

فأنتى اللى يهمك جوزك انه يحس انك جايه على نفسك علشانهم و ساعتها هايشيلك على راسه

الليووووووووونه برضوا

انا مش فاهمه اى كلمه اللى بسببها هايقطعوكى كلمه هو ابنى و لا ابنك و لا انه مش يفتحلك الباب كده

بس على العموم الاتنين غلط منك

لو هو فتح الباب و هو كده مش انتى اللى تلفتى نظره

و حكايه ابنك برضوا هو عمه و خليه يا ستى يشيل

لو جرب مره مش هايجرب التانيه

حاولى مايكونش فيه مقاطعه و اقعدى مع جوزك و قوليله انا هاجى على نفسى ع لشان خاطرك

و صدقينى هايشيلهالك فى قلبه و هايرجع الاحترام اللى بتقولى عليه

لو نفع رأيى ياريت تبلغينى

تحياتى

اغتصاب مع سبق الاصرار

2009-05-20T06:17:00.000-07:00

ضغطت كتير على روحها علشان تعرف تتكلم

حاسه انها فى كابوس مش عارفه تفوق منه

كانت بتتكلم مع نفسها و بتقول لو رجع الزمان ما كانتش خرجت فى اليوم ده

رغم انها لابسه محترم و ماشيه فى وقت مناسب

ما منعش المجرم انه يهددها و ياخد اغلى ما عندها

تمنت لو ماتت و لم تعش طول عمرها بين الحياه و الموت

نظرات الناس بتموتها كل يوم اكتر من مره

ما بقتش زى ما كانت

ضحكتها و برائتها و احساسها بالامان كله راح مع الحادث

و دلوقت مضطره تحكى تفاصيل مخزيه و مؤلمه و تعيد و تزيد فى اللى حصل

و كمان الصحافه كله بيخليها تحكى بدل المره مليون

اسأله سخيفه مضطره ترد عليها

فين الحياء اللى يخليها تحكى كل التفاصيل دى لاكتر من واحد

زى ما يكون مستخصرين فيها النسيان ده لو قدرت عليه

حاسه انها فى غيبوبه بتتحرك بس مش حاسه

مش عارفه هاتفوق امتى و لا اصلا هاتفوق و لا لاء

مافيش حد حواليها إلا و جواه مليون سؤال

ياترى الناس لما تعرف هاتقول ايه

و اخواتها هايتجوزا ازاى

و اخوها هايرفع راسه ازاى

و بدل ما يكون الجانى هو اللى حاسس بالعار هيه و اهلها اللى حاسه بيه

لو اتسرقت مش هاتحس بالعار طيب مهى اتسرقت برضوا بس بطريقه تانيه

ليه الناس بتفكر كأنها مدانه و بقت عار هيه و اهلها و حكمت عليها من غير محاكمه

لو ماكانتش بلغت محدش كان هايعرف بس تسيبه يفلت باللى عمله

و لو بلغت تعيش بالاحاسيس دى

كل دى افكار بتجيينى كل ما بشوف جريمه اغتصاب جديد

و كتبته بالاحمر على غير عادتى

و مع الاسف ده بيحصل كل يوم تقريبا

لو الجانى ماخافش على بنات الناس يخاف من ربنا يخاف على عرضه هو شخصيا

بقت حاجه تقرف

التاج ده جانى و رب العرش نجانى

2009-05-02T16:27:00.000-07:00

التاج ده جانى من حبيبت قلبى Soul.o0o.Whisper و الله البنت دى انا بحبها جداااااااااا

و هيه عارفه ده و ربنا يحببنا فى بعض يارب دايما

المهم انها دبستنى فى تاج حاسه انه استجواب فى امن دوله بس ماعلينا

يجعل كلامنا خفيف عليهم

اشتاتا اشتوت

نيجى بقى للمحضر قصدى الاستجواب قصدى للاسئله

اسمك؟

طيب ما انتى عارفه بتسألى ليه؟

المشهوره بيه وسط اصحابك؟

ام البنات

سنك؟

ده علشان المحضر يكمل 30

طيب مهو مكتوب فى العريف بتاعى

و بعدين هو ده سؤال يتقال لبنات حواء برضوا

مجال دراستك؟

ما انتى عارفه برضوا و بعدين الحدق يفهم اللى يركز هايعرف

ههههههههههههههه

اسم مدونتك؟

جواز و اتجوزنا برضوا فوق فى المدونه مالهم بنات مصر

صورتك الرمزيه فى المدونه بتعبر عن ايه؟

صوره عروسه بس تحسيها كده حيرانه مش عارفه ليه

بس دلوقت عرفت ليه

اتجوزت

هههههههههههههههه

هل فكرت فى اغلاق مدونتك؟ والسبب؟
اه فكرت لما لقيت لاشر كتير فى الدنيا فكرت اقفلها و لقتنى بسأل ايه فايده كلامى لما الناس بالمنظر ده

و اكتأبت جامد جدا فى الفتره دى

ايه رد فعلك لو حد قل ادبه عليك فى تعليق؟
يعنى هيه الحمد لله ماحدش عملها بس لو حصلت و كانت قله ادب مش نقد اكيد هاشيل التعليق

اسوء مدونه ؟

من غير دبلوماسيه مش بتابع حد وحش و الله

هايحصل ايه للايميلات بعد ما تموت؟
مش عارفه ؟ اكيد مش تتفتح

اديت الباسوورد لحد قبل كده؟
اه زوجى العزيز طبعا و اكيد لما العيال هاتكبر هاديهالهم

السفر بالنسبه لك؟
اكيد متعه بس دلوقت و مع العيال بقى صعب شويه

المود بتاعك ايه؟
انا جوزاء و الجوزاء شخصيتين و انا الاتنين

بتعمل ايه فى وقت فراغك؟
هو فين وقت الفراغ ده

ده انا بقعد على النت بالعافيه بس لو فيه بيكون للنت

الاكله المفضله؟
المكرونه و الحلويات

الصفات اللى اخدتها عن والدك؟
انا بحس انى نسخه من بابا من غير تفاصيل

الصفات اللى اخدتها من والدتك؟
الرقه

اكتر 6 حاجات بتكرههم؟
الكدب

الحقد

الخيانه

الغباء

اللف و الدوران

الاسئله الكتير

اكتر 6 حاجات بتحبهم؟

عكس اللى فوق هههههههههههه

بحب الوضوح و النقاء و ان الناس تكون احسن من كده لان الدنيا مش مستاهله

شخصيتك نوعها ايه؟
حاسه ان السؤال ده جه قبل كده

بس لو صفات عامله فأنا بحالات

مره شعنونه و مهيبره و مره عاقله و رزينه و الكلام اللى بحساب

فيه قصه اسمها دكتور جيكل و مستر هايلد اهه اده انا بالظبط

لماذا دخلت التدوين من الاساس؟
اكيد مش فضا

بس شفت حلقه عن المدونين و دخلت اعرف الحكايه حصوصا انى فى النت من زمان

و لما دخلت عجبتنى الحكايه و كملت

اجمل كلمه قيلت فى وصف مدونتك؟
و الله كلام كتير حلو من ناس حلوه كتير مش عايزه انسى حد

اهميه التعليقات بالنسبه لك ايه؟
زى عيالى بالظبط

ههههههههههههههه اكيد مهمه بتحسسنى ان فيه حد سامعنى و متفاعل و فاهمنى او بيناقشنى

احلى بوست كتبته؟وضع اللينك ثم اذكر السبب؟

انا مش كتبت بوستات كتير رغم انى ليه اكتر من سنه

بس بحب البوست ده

امسك مناخيرك من فضلك

علشان الناس بقت حشريه بزياده

http://lonlyme.blogspot.com/2008/10/blog-post_24.html

افضل مدونه قرأتها؟

كتير و الله مش عايزه انسى حد بس والله انا عرفت هنا ناس دماغها ماشاء الله عليها

افضل بوست قرأته؟

كتير برضوا افتكرهم ازاى بس

و هادور عليهم ازاى برضوا

اسئلتك معقربه اوى يا استاذ طارق علام

الشغل بالنسبه لك؟

زمان و لا دلوقت

زمان مش كان نفسى اشتغل كنت حاسه ان الشغل بهدله و انا يصعب عليه اتبهدل

دلوقت برضوا النظريه اللى فاتت برضوا مازالت قائمه بس نفسى احس انى بستغل امكانياتى من غير ما اتبهدل

حد فاهم حاجه ؟؟؟؟؟؟؟؟؟؟

الانترنت بالنسبه لك؟

نافذه على العالم بجد بحبه توى مش عارفه ليه ؟

تمرر التاج لمين؟

ياااااااااااااه فرصتى بقى و استغلها

الباشمهندس المحترم صاحب مدونه من غير عنوان

طبعا مخنوقه حبيبتى صاحبه يوميات زوجه مخنوقه ربنا يفك خنقها

هابى الجميله صاحبه مدونه على بالى

روفى طبعا صاحبه مدونه لقاء الاحبه

محمد جلال و هل تبحث عن السعاده مين مش بيبحث يا محمد

منوش الجميله و هيه كمان مخنوقه بس خانقه غير الاولانيه

المصريه المسلمه لله و ربنا يجعلنا معاها فى الاسلام و نفر معها لله

لجين ابو الدهب علشان نفسى اعرف اجابتها على التاج و على الله تقولى ما انتى عارفه

77Math علشان حاسه انها دماغ و هاتكيفنى اجابتها

بس خلاص على رأى شعبوله

و دمتم سالمين

خراشوف

2009-03-23T11:57:00.000-07:00

اولا عايزه ارد على الناس فى البوست اللى فات بس الوقت مش ساعفنى
و بعدين مافيش حد و دخل و لقى لسه الكوبايه موجوده إلا لما اتريق حتى زوجى العزيز

فقررت انى اكتب بوست جديد مع التأكيد على انى هاعلق على القديم

ــــــــــــــــــــــــــــــــــــــــــــــــــــــــــــــــــــــــــ

حصل حاجات كتير اوى الايام اللى فاتت كان عيد ميلاد ميـــــار و روشـــان بناتى اللى شايلنى من على الارض شيل

و ده طبعا علشان لما بيجروا بيشلونى فى طريقهم

عايزه اقولكم ان شكلهم البرئ ما يخدعكم دول مجننى

مخلينى اقفل كل درف المطبخ و بيطلعوا فوق تربيزه السفره و بيرموا حاجات على النجفه اللى لما جبناها

ماكانش عندنا تصور اننا هانجيب قرود و جبناها طويله

اظاهر كان المفروض نجيب نيون و بلاها نجف

مش عايزه اسوء سمعهم اكتر من كده

بس اكيد بقولهم مرسى انكم فى حياتى رغم تعبكم

ــــــــــــــــــــــــــــــــــــــــــــــــــــــــــــــــــــــــــــ

عيد الام

بحب اقولك يا امى رغم انك مالكيش فى التكنولوجيا و مش هاتقرى البوست ده

و يمكن من كسوفى اكيد مش هاورهولك

بس انتى فى عيونى اعظم ام

مش علشان انتى بتعملى احسن بفتيك و حمام و حاجات كتير مش فاكرها

بس علشان انا لما جيت اتجوز بابا قالى خليكى زى مامتك

فخلانى احس انك مثل لازم اوصله فى حاجات انا مش كنت واخده بالى منها بس هو قالهالى

و انى فى الاخر و رغم كل حاجه , انتى مثل لازم يكون امامى

بحبك يا امى

ــــــــــــــــــــــــــــــــــــــــــــــــــــــــــــــــــــــ

خراشوف بقى ده حكايته حكايه

و ده علشان انا قررت اتكلم روسى

و ده علشان ابقى استايل

علشان كل الناس دلوقت بتتكلم انجليزى فمبقاش استايل خلاص

فقررت انى اتكلم روسى زى هنيدى فى فيلم جائنا البيان التالى

و اتكتشفت اننا الشعب الوحيد الفريد اللى بيتكلم لغه غير لغته وسط كلامه

عمرى ما شوفت يابانى بيقول كاشاتا موهاتا ياساتا

و فى الاخر يقول كلمتين انجليزى

احنا شعب فريد فى كل حاجه

و محدش يقلدنى و يتكلم روسى

سلاموز

و دمتم سالمين

نظريه الكوبايه

2009-02-04T17:08:00.000-08:00

للى ما يعرفش نظريه الكبايه رغم انها نظريه هايله
النظريه تكمن فى ايه بقى
لو لقيت حد كويس كان او وحش هاتلاقيه يا اما اغلبه فاضى او اغلبه مليان
و بتختلف الجزء الفاضى من شخص لشخص
و من اللى جو الكبايه من شخص للتانى
علشان كده لازم تكون مقتنع ان زى ما فيك جزى فاضى فالاخر برضوا فيه جزء فاضى
و عليك ان تقبله بجزئه الفاضى زى ما هو قابلك بمميزاتك و عيوبك
اهم حاجه ان الجزء الفارغ ما يكونش فى حاجات اساسيه زى البصبصه و البخل
و ابن امه و بنت امها و الكدب اهم حاجه لانه اس البلاوى فلا تأمن لكذاب ابداااا
زى ما انت مش كامل ما تطلبش الكمال من الاخر
ــــــــــــــــــــــــــــــــــــــــ

سؤال المشاهدين يا ترى نفيسه مرات سرحان اللى بيحاول يقتلها و مش عارف
ياترى ما ماتتش علشان
1- اتكتبلها عمر جديد
2- زى القطط بسبع ارواح
3- علشان لو ماتت الناس دى تاخد فلوس الغلابه اللى بيتصلوا ازاى

4- علشان يعلموا الناس لما تييجى تموت حد ازاى تعرف تقتل من غير اخطاء لانهم هايتلافوا اخطاء سرحان خصوصا ان كل اللى خسرله قرشين فى البورصه بيدور قتل فى عيلته

لو عرفت الحل اتصل بيه على 0900 و حتى اهه نطلع من التدوين ده بسبوبه

و دمتم سامين

احنا اتضحك علينـــــــــا

2009-01-04T14:33:00.000-08:00

بعد غياب طويل اردته لنفسى

رجعت و اعتذر لعدم الرد على باقى الردود فى البوست اللى فات

و ده علشان اكتشفت منها انى لازم ارد رد عام على الكل و لانى كمان صعب تواجدى بكثره على النت

اكتشفت ايه بقى يا بنـــــــــــــــات

اكتشفت و لا نيوتن فى زمانه اننا اتضحك علينا

اكتشفت اننا بنقعد طول عمرنا مستنين فارس الاحلام و الحصان( رغم انى اعترض على الحصان متهيألى نستبدلها بعربيه بى ام او شبح او اى حاجه اسبور كده مع البعد كل البعد عن ال128 و العربيات الكحيانه مهو حلم بقى )

طلعت بره الموضوع ندخل تانى

اكتشفت اننا قعدنا نستنا و الرومانسيه هاتقتلنا و فى الاخر طلع نأبنا على كام شهر طالوا و لا قصروا فهمه كام شهر برضوا همه فتره الخطوبه و اول كام يوم جواز

و بعد كده بـــــــــــــــح على رأى بناتى

مش عايزه اقول ان الحياه بعد الجواز وحشه بالعكس هيه احسن كتير

بس احسبوها واحده قعدت تستنى كام سنه ؟؟؟ نقول من 17 إلى 27 علشان ده تقريبا السن اللى بيحصل فيه اغلب الزواج

يعنى تقريبا عشر سنين و فى الاخر تصفصف على كام شهر؟؟؟ده حتى يبقى ظلم

و علينا ان نتعايش مع ظروف الزمن بعد كده

و انك تستنى الاعياد يا حرام علشان يجيلك ب ورده او حتى تحسى بشويه رومانسيه

عارفه ان الرجاله وراهم مسؤليات كتير

بس الست زى الورده لازم تحسسها انها لسه ما دبلتش مهما كان سنها

و لازم ترويها كل شويه بشويه كلام مش هايكلف الرجاله كتير

بس مين يسمع

و دمتم سالمين

انت ليه مش بتمسك ايدى

2008-11-09T18:16:00.000-08:00

اولا احب اشكر محاسن كتر خيرها علشان هيه اللى دايما بتنبهنى انى اتأخرت فى الكتابه بس غصب يارب و بقولك اهه يا ستى علشان خاطرك البوست ده

و ثانيه اللى ما ردتش عليهم ان شاء الله هارد عليهم بس افضى و الله من العيال و البيت و سنيه

ـــــــــــــــــــــــــــــــــــــــ

نخش فى الموضوع

مره قريت موضوع كوميدى عن واحده كانت بتحب واحد و بتقوله انت ليه مش بتمسك ايدى

قالها لما نتجوز كده عيب... و بعد كده قالها ما احنا لينا بيت الناس تقول علينا ايه... و بعد كده انا هامسك ايدك و لا ايد العيال... و بعد كده حنا كبيرنا على الحاجات دى انتى عايزه جوز بنتك يقول علينا اتجننا

و كان ليه واحده صحبتى خالها كان خاطب و خطيبته( ايام زمان بقى علشان الحاجات دى اندثرت) ماكانتش عايزاه يمسك ايدها فكان بيشتكى و يقول طيب هو انا لو ما مسكتهاش دلوقت هامسكها بعد الجواز ليه؟؟؟

منطق برضوا طبعا ههههههههههه

بس لقيت بعد تفكير و تمحيص الفرق بين الزوجه و الحبيبه

و طلع اهم حاجه ايه تخيلواااااااااااا

طلع ان احساس الوحد انه ممكن يسيب الحبيبه بيديه الحريه فا يتمسك بيها لان مافيش حاجه تجبره غير رغبته انه يكون جنبها

لكن الزوج قبل ما يفكر يسيب لازم يفكر فى النفقه و الشقه الحضانه إلـــــخ يعنى متمسك بس غصب عنه

و بجد يفرق كتير اوى انك تحس انك لوحدك قيمه او ان الاثاث هو القيمه

طبعا مش كله كده بس اهى نظريه برضوا

يلا بقى علشا اروح اصلى و انام

دمتم ساااااااااااااااالمين

امسك مناخيرك من فضلك

2008-10-24T17:11:00.000-07:00

كل واحد منا المفروض يمسك مناخيره زى الفيلم بالظبط

و ده ليه ؟؟؟؟

علشان كلنا .....اه كلنا فى الغالب بيحط مناخيره فى اللى مالهوش فيه

و تعابنا غيرنا بمناخيرنا دى

لما البنت تكون لسه ما اتجوزتش تلاقى كل الناس بتسأل

هاااااااا مافيش حاجه كده ؟؟؟؟؟

و تلاقيهم بيقولوها و همه بيتصعبوا اوى مش عارفه ليه

و لما تتجوز السؤال بيتغير

هااااااا مافيش حاجه جايه فى السكه؟؟؟؟

قمه الحشريه طب و هو مالهم مهو لما يكون فيه حاجه هايشفوها مش محتاجين يسألوا

اللى جاى بقى لو كانت جابت بنات

تلاقى الناس عماله تتصعب و تقولها ربنا يرزقك يا حبيبتى بالولد

و اكترمن كده مواقف تلاقى المناخير طلعت فى الحال

بس اكتشفت ان الناس مش البنات فى حالهم و لا و همه مش متجوزين

ولا و همه متجوزين

ساعتها بس فكرت همه ليه ما عملوش الفيلم بتاع امسك مناخيرى من فضلك

يمكن خايفين من الانفلونزا

الله اعلم؟

و دمتم سالمين

حبه رومانسيه

2008-10-09T18:28:00.000-07:00

خطر فى بالى سؤال

ليه الناس بتتجوز؟

انا بتكلم بجد مش بهزر

علشان فيه ناس بتتجوز علشان تخلف

و فيه ناس بتتجوز جواز مصلحه

ده حتى فيه ناس بتتجوز علشان بيتهيألها ان الجواز هايصلح حالهم اللى مايل

كمان فيه ناس بتتجوز علشان خايفه تكبر على الجواز

او حتى علشان تبعد بعيد عن بيت الاب و الام

السؤال بقى

هو المفروض الناس بتتجوز ليه؟

و السؤال الأخطر

ايه ذنب الطرف التانى اللى داخل سواء بحسن نيه

او حتى علشان ليه اسبابه الخفيه هو كمان

المفروض الناس تتجوز علشان تسعد بعض

و بــــــــــــــــــــــــــــــــــــــــــــــــــــــــــــــــــــــــــــــس

و اللى شايف نفسه مليان عقد ياريت ما يتعبش معاه طرف تانى ممكن يكون اصلا مش ناقص تعب

و دمتم سالمين

الدين للشحاته بس

2008-09-26T12:41:00.000-07:00

اولا كل سنه و انتوا كلكم طيبين

نخش فى الموضوع طبعا كلنا الحمد لله عزمنا و اتعزمنا و هلكنا فى رمضان و الحمد لله

و بما انى بشتغل فى البيت فى رمضان 18 ساعه اه و الله مش بفشر

من 12 ظهرا حتى 6 صباحا فكان لازم انى اطرى على نفسى بكام برنامج على كام مسلسل كده اسمعهم طبعا فى زحمه شغل البيت و العيال

المهم اتفرجت على برنامج كانوا مستضيفين فيه الشيخ سيد بتاع تفسير الاحلام و اكتشفت انه عضوا فى لجنه الافتاء و كمان كان الاول فى مش عارفه ايه

المهم طلع الراجل كفائه علميه بغض النظر عن تفسير الاحلام

المهم المذيعه و بالاشتراك مع كام واحد كده هاتك يا هجوووووم فزيع عليه اه و الله

مش بدافع عنه بس خدوا دى بقى

فجأه جه اعلانات مستشفى سرطان الاطفال

فجأه بقى الدين حلو و بنستشهد بيه علشان يكون كل اللى مش هايبعت فلوس فهو آثم

انا مش بقول الناس ما تدفعش للمستشفى

بس بقول ليه الناس بتستخدم الدين فى الشحاته و بس

و لما تييجى تكلمهم عن حجاب اوى اى حاجه من اصول الدين كل واحد يعمل فيها علامه زمانه

و الله انا سمعت فى الرنامج واحده بتكلم الشيخ سيد

و هيه اصلا مش محجبه و بتقلوا انت مش وصى على الدين و انها بتقرأ قرآن و فاهمه كل حاجه

و هو اللى حافظ القرآن جنبها و لا حاجه

كنت خلاص مفقوعه من كتر الغيظ و الحزن

يلا كل سنه و انتوا طيبين

و متم سالمين

يا لهوىىىىىىىي

2008-08-30T08:46:00.000-07:00

اولا كل سنه و انتم طيبين

ثانيا جاتلى رساله ضحكتنى جدااااااااا

مش هاقولكم عليها

لاء هاقول علشان انتم كمان تضحكوا

بتقول

بمناسبه شهر رمضان الكريم حبيت اكون اول واحده تقولك

توبى يا صايعه

مش عايزه اقولكم هلكت من الضحك و انا بقراها بس ما يمنعش انى مسكت صحبتى و هزأتها بس و انا فطسانه من الضحك

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

المهم هاقولكم مصيبه شوفتها بأم عينى

حلوه اوى ام عينى دى بتبين اهميه اللى جى.

كنت فى النادى امبارح عادى و مافيش مشكله

لقيت مجموعه بنات و اولاد كل واحد منفرد بمزه قصدى بنت و هاتك يا رغى

و شويه و لقيت خناقه مش فاهمه فحواها ايه

المهم البنات و الاولاد دول الحبيبه عندهم كام سنه

و الله ما يطلعوش اكتر من 12 سنه

يعنى لسه اطفال احباب الله المفروض

لاء و سمعت طراطيش كلام كده واحده منهم بتقول لولد فى الخناقه يعنى ما اقولش انى بحب هشام

و الله العظيم انى اتعكننت اخر عكننه

فين الامهات الفاتنات اللى سايبه بناتها من غير رقابه

فين التربيه و لا لسه الهانم مش عارفه ازاى تربى

و لا بنت من الخمسه كان معاها مامتها ليه تراقب من بعد ايه اللى بيحصل

ربنا يهدى بنات المسلمين اجمعين

و دمتم سالمين

تيمور و مهند و غيرهم

2008-08-12T16:50:00.000-07:00

بعد انقطاع طويل نظرا للمشاغل الفزيعه اللى انا فيها

و بجد مش لاقيه وقت اقعد على الجهاز خالص

عايزه اقولكم بجد ان كلكم وحشتونى

و اخص بالذكر مسز سوسه و اسراء حامد و فيس مون و دكتور بهدوء و واحده مفروسه

و عايزه اقول لكل اللى ما ردتش عليه و الله غصب عنى و لكننى اقرأ بعنايه كل كلمه يكتبوها

ـــــــــــــــــــــــــــــــــــــــــــــــــــــــــــــــــــــ

عايزه اقولكم على حاجات كتير اوى اوى اوى

عايزه اقولكم انى شوفت فيلم تيمورو شفيقه

عايزه اقولكم انى نسخه من شفيقه لدرجه انى اعدت اضحك من كتر مهى شبهى

و اكتشفت ان كل البنات عايزه واحد يشكمها زى تيمور و كمان مايبقاش وراه حاجه غير انه يحبها زى مهند

و رغم انى ما تابعتش مسلسل نور ده خالص و رغم انى فى منتهى الرومانسيه بس شايفه انه صعب جدا يكون كل اللى ورى الناس هيه الرومانسيه

ده حتى يبقى زهق يا ناس

طيب فين الشغل و فين العيال

ايييييييييييييييه هيه الناس ما وراهاش حاجه غير الحب

الاعتدال مطلوب فى كل حاجه حتى الحب

و بعدين الحب مش ورد و هدايا الحب اهتمام و خوف على الاخر و الاهتمام براحته

ساعتها بيكون ابلغ كتير من كلمات الحب اللى مش مترجمه لافعال

و كالعاده دمتم سالمين

عوووووو يا ناس

2008-07-02T09:23:00.000-07:00

اولا و قبل كل شيئ احب اقولكم ان الموضوع ده حصل فعلا مش تأليف يعنى

احنا اخدنا شقه جديده

و ببساطه كان لازم تتنضف

اخدت البنت الشغاله و رحت انضفها

لغايه كده عادى

و هيه كانت بتمسح و انا كنت بجيب الميه اللى بتسمح بيها

كنت فاتحه الماتور علشان الميه كانت ضعيفه

و طلعت و رجعت لقيت الماتور مطفى

قلت يمكن انا طفيته و انا مش واخده بالى

بس بقى بدأت ألاحظ

ساعتها ولعته و سبته مولع

و لتانى مره لقيته اطفى

مش هاقولكم احساسى كان ايه بقى ساعتها

بس لغايه اللحظه دى كنت بكدب نفسى برضوا

فجأه لقيت نور المطبخ كان مولع و اتطفى

هاتقولولى جايز البنت هيه اللى عملت كده

لاء لانها كانت فى حته تانيه خالص بعيد عن المكان ده

رحت مخلصه الشقه بسرعه اى كلام

و مشيت بسرعه و انا بفتكر هنيدى و هو بيقول بنتى يا مولانا راكبها جووست

بس بجد كنت مرعوبه

تجربه شخصيه

و دمتم سالمين بدون اى جوست يارب

قله ادب مشروعه

2008-06-18T15:37:00.000-07:00

بعد غيااااب طويل بسبب الاطفال اللى همه احباب الله
خطرت ليه حته دين فكره غريبه شويه
و الفكره جاتلى و انا قاعده ادام التليفزيون و ده مش بيحصل كتير مؤخرا بسبب المشاغل
كان شغال فيلم عربى
و بعدين البطل مسك البطله و هااااااااااتك يا بوس
مش عارفه ليه تخيلت الاخ المحترم زوج البطله و احساسه ايه و هو بيشوف مراته فى الوضع ده
و ازاى قادر يقنع نفسه ان ده تمثيل و آل ايه فن كمان و ليه هدف
طيب ايه الهدف ان مراته يا حرام تتباس ادام عينه و هو عامل مغمض
كمان ايه احساس الابن او البنت اللى بتشوف امها فى المنظر ده
خلاص بلاش البوس طيب الاحضان و لا دى ماحدش يقدر يقول فيها حاجه
طيب لو زوج الفنانه جمعته الظروف بالبطل القدير اللى عمال هايص مع مراته
يحطوا عنيهم فى عنين بعض ازاى ياناس
حسيت انى آخر تخلف و انا بسأل الاسئله دى
بس فى الاخر قلت لو ده تفكير الصعايده و الفلاحين فالحمد لله على دى نعمه
و دمتم سالمين

تهييس فى تهييس

2008-05-25T06:49:00.000-07:00

مش عارفه مش عايزه اتكلم على موضوع معين

بس فى دماغى افكار كتير ملغبطه

كل واحد فيهم مشكله لوحده

مثلا

****ليه بيتكلموا على شرف البنت و شرف الولد لاء

رغم ان الاتنين ليهم نفس الشرف

بدليل ان لو فيه حد اعتدى على ولد ساعتها بس بيتكلموا عن شرف الولد

ليه المطلقه او الارمله ينظر إليها على انها used اى مستعمله

اسفه للفظ بس هيه دى الحقيقه

فى حين ان الراجل المطلق او الارمل لا ينظر له هذه النظره

****شفت فى العاشره مساء الصيادين اللى اتمسكوا فى ارتريا و بهدلوهم ضرب و جوع

و بعد سنه راحلهم السفير و افرج عنهم مش عارفه هو يادوب افتكر و لا ايه؟

****ليه بينقال نهايه الحب ايه ؟؟؟ الجواز و تكون هيه دى الحقيه

و التعود بعد الجواز يبهدل الدنيا

**** هانعمل ايه بعد زياده مصاريف المدارس

تفتكروا نرجع للكتاب من تانى

****بنتعلم ليه لو احنا مش هانشتغل باللى اتعلمناه

**** نفسى اتصرف بحريتى من غير ما اعمل حساب للناس و ده يقول و ده يعيد حتى لو اللى بعمله صح

و مخ الناس هو اللى غلط

****نفسى اوى اوى اوى اكل ايسكريم ساقع فى الحر ده يمكن يجمد الافكار اللى فى دماغى و ابطل تفكير

و دمتم سالمين

اسهل طريق لقلب جوزك معدته و لقلب مراتك ودانها لامؤاخذه

2008-05-13T17:08:00.000-07:00

اه و الله
اقريب طريق لقلب المرأه ودانها
بس مش عارفه ليه الراجل لما بيكون معاه المفتاح بيسيبه و يروح يجيب شاكوش
و يقعد يكسر فى الباب علشان يفتحه
و الغريبه ان الست تقوله ما المفتاح معاك لكن لا حياه لمن تنادى
ليه صعب على الرجاله كلمه بحبك
مش مطلوب طبعا انها تكون كل يوم اصلها مش مضاد حيوى
بس من حين لاخر الواحد بيكون محتاج مسكن
مره واحده بتقولى مابقاش زى فتره الخطوبه
قلتلها لو فضل زى ما كان وقت الخطوبه يبقى مجنون و سألتها
لما بيمسك ايدك دلوقت بتحسى زى ما كان بيمسكها و انتوا مخطوبين
قالتلى لاء طبعا
قلتلها اشمعنى عايزاه يحس بنفس المشاعر و بنفس القوه و انتى نفسك اتغيرتى
ففهمت و سكتت و بطلت تشتكى
بس من آن لآخر قولها و لا تبخل
قولى بحبك بصوت عـــــــــــــــــــــــــــــــــــــالى

تاج و لا تاج محل فى زمانه

2008-05-11T08:41:00.001-07:00

التاج الغالى ده هو اول تاج جالى
و دايما احلى بخت هو اول بخت
علشان بيكون ليه غلاوه خاصه
جالى من FaceMoon صاحبه مدونه انا غير كل البنات
و احب اقولها انها فعلا غير كل البنات و شكرا على التاج الجميل ده يا قمر
و انى اول مره اعرف حكايه التاج دى منها و شكرا على زوقك العالى
و عقبال ما تكملى صولجان زى ما قولتى

أولا:اذكر عشرة اشياء عن نفسك .....عشره كتير اوى ربنا يسهل و اعرف اقول كلمتين مش عشره

ثانيا:اختر خمس اشخاص تهدى لهم التاج .....نفسى اهديه لناس كتير بس فيه ناس منهم لقيتهم لسه مجاوبين على تاج فامارضتش اتقل عليهم زى علاء سالم

ثالثا:لا تهدى التاج لمن اهداه اليك ..... علم و ينفذ و لك يزم يا ظالم قضدى يا فيس مون

رابعا:عرف اللى بعتلك التاج انك نزلته عندك...... عنيه بس كده

بسم الله نبدأ
الاجابه على السؤال رقم واحد حاسه انى فى امتحان

1 _ اكتر صفه تميزنى انى رومانسيه جداااااااااا تقدروا تقولوا من هنا للصبح بس الحمد لله بعقل يعنى مش رومانسيه و السلام لدرجه انى بجد بحل مشاكل اصحابى و بيثقوا فى رأيى جدا و الحمد لله بيطلع صح

2- رقيقه برضوا جداااااااااا و لو كنتوا خلصتوا الصبح تقدروا تكملوا لغايه الصبح التانى
و دى بقى المشكله لانى كان فيه ناس بتفكر انى بصطنع الحكايه دى بس مع طول الوقت بيفهموا انها طبيعه فيه و الله مش تصنع بس بجد الموضوع ده كان مسببلى عقده بس الحمد لله اتحلت

3- بحب افهم كل حاجه بدماغى و ليه فلسفاتى الخاصه جدا و الحمد لله بتكون صح برضوا و لما ييجى وقت لحاجه فيها فلسفتى الخاصه هابقى اقولكم

4- بحب بابا و ماما جداااااااااااااا و زوجى جداااااااااااااااا و و اولادى جدا جدااااااااااا ثم الجميع بعدهم

5- الحمد لله علاقتى مع الله جميله و بحاول على اد ما افهم انى التزم و افهم دى ليها فلسفه بس مش عايزه ادوشكم
اصمع ان يغفرلى الله ذنوبى و يدخلنى برحمته الجنه

6- مش عارفه هيه ميزه و لا عيب بس انا سهل انى اسامح اللى غلطوا فيه بسهوله رغم انى لا اقبل الغلط لانى لا اسمح لنفسى بالغلط
بس بجد بلاقى نفسى بسامح الناس و ارجع كما كنت

7- تقدروا تقولوا ست بيت شاطره و الحمد لله و ليا وصفاتى اللى بتجنن الناس و اتفضلوا عندنا لو كمان و مش عزمه مركبيه

8-حساسه اوى و دى مشكله جامد بحاول انى اسيطر عليها و ربنا يكرمنى و اقدر اتخلص من الداء ده

9 - بحاول على اد ما اقدر اكون الشخصيه اللى اكون راضيه عنها دينيا و ادبيا و ده الحمد لله بيلاحظه الناس اللى حوليه

10 - الحمد لله خلصنا و بجد مش لاقيه كلم تانى اقوله عن نفسى غير انى بجد بكون مبسوطه لما بحس ان فيه حد استفاد من كلامى و انى مش بنفخ فى اربه مقطوعه لان صعب عليه اوى و بحس زى ما اكون بنيت بيت و ماحدش سكن فيه

ثانيا : الاختيار و دايما الاختيار بيكون صعب انا نفسى ناس كتير تجاوب و تتعصر كده زيى
نبدأ بالبنات و بعد كده الاولاد

1- صيدلانيه طالعه نازله و صاحبتها صيدلانيه طالعه نازله

2- الطريق إلى الكوشه و صاحبتها مسز سوسو

3- مذكرات عروسه ننوسه و صاحبتها جنه

4- دكتور بهدوء صاحب مدونه نقول كمان

5- دوشه و لا بد منها صاحبها دارش

و التاج اللى يجيلك منه الريح جاوب عليه و استريح
جارى التبليغ ان شاء الله و دمتم سالمين

نقارهم و لا خلو دارهم

2008-04-13T08:27:00.000-07:00

المثل ده سمعته من وقت قريب فى التليفزيون
و عجبنى اوى اوى اوى
علشان فعلا الناس بقت ما عندهاش تمسك بالجواز مش عارفه ليه ؟
حوليا كتير اوى بيشتكوا من الجواز و سنينهع و ناس بيتهيألها ان الطلاق ده سهل جدا
و الغريب ان الناس اللى حوليهم تلاقيهم بيملوا دماغهم بحاجات غريبه زى
سبيه و انا اجوزك سيد سيده او سيبها و انا اجوزك ست ستها
طيب تعرفوا انا اعرف اتنين اتطلقوا و كل واحد منهم اتجوز و بعد كده كل منها طلق و اتطلق و رجعوا لبعض
طيب بالذمه مش حاجه تفقع ؟؟؟ طيب ما كان من الاول
و لا كل واحد مهم كان مع التانى بس ما حسوش بقيمه بعض إلا لما بعدوا عن بعض
طيب فين ست ستها و سيد سيده ؟؟؟
فيه مقوله بتقول ان محدش بيعرف قيمه الحاجه إلا لما بتبعد عنه
و دايما اصعب سنه هيها اول سنه فى الجواز و بتختلف على حسب تغير الاشخاص
بس دايما افتكروا
نقارهم و لا خلو دارهم
و دمتم سالمين

انا مصرى و ابويا مصرى بس احب ابنى يكون امريكانى

2008-03-24T11:58:00.000-07:00

ماكونتش ناويه اتكلم فى السياسه لاسبابى الخاصه
بس فيه حاجه فاقعه مرارتى و غيظانى
الموضوع يخص الجنسيه المصريه و السبب هو المطربه شرين عبد الوهاب
سمعت و الله اعلم انها هاتسافر تولد بنتها فى امريكا علشان بنتها تاخد الجنسيه الامريكيه
ساعتها بس اتفقعت مرارتى و ماقدرش استحمل خلاص
امال فين ما شربتش من نيلها طب جربت تغنيلها
و لا هيه ناويه تشربها مياه معدنيه و اكيد مش من المضروبه بتاعه مصر اكيد هاتجيبها معاها و هيه جيه من امريكا
اللى غظنى ان الاغنيه اللى غنيتها جميله جدا و تخلى الواحد هايطق من الوطنيه
و تلاقيها اول واحده شايفه ان الجنسيه المصريه مش كفايه علشان بنتها و انها محتاجه حاجه تسندها
يعنى نوصل لان فيه ناس مصريين بيتعاملوا معامله vip مش لميزه فيهم اكتر من انهم يحملوا جنسيه تانيه
زمان كنا بنقول و بنردد و بكل فخر لو لم اكن مصريا لوددت ان اكون مصريا
فين الشعارات دى راحت و لا راحت مع اللى راح
و لا طلع كلام اغانى و راح لحاله و لا تلاقيها ليها فتره ما شربتش من نيلها و يبقى عندها حق
علشان مشاكل الميه المعروفه
انا كده فشيت غلى و ارتحت لما قولت اللى عندى لحسن خلاص كنت هاروح اشرب من نيلها و ارمى روحى فيه

تأثير النت على حياتنا الشخصيه

2008-03-15T15:18:00.000-07:00

حاجه غريبه جدا قريتها النهاده فى الجرنال
واحده لقت ان صورها منشوره بصوره خليعه لكل اقاربها و اصحابها اللى على الميل بتاعها
و قالت ان الصور دى مفبركه
و بعد البحث و التمحيص اتضح ان حبيبها السابق هو السبب فى ما حدث و ان الصور غير مفبركه
لانه هو اللى عمل لها الميل و كان عارف كلمه السر بتاعتها
و هيه كانت قالتله انها حاطه الصور بتاعتها على الميل بتاعها
الغريب انها بنت شخصيه معروفه و حتى لو مش معروفه ده تصرف مش صحيح
ان بمنتهى السهوله حد يحط صوره على النت كده
فكرتنى الحكايه بهوس الفيس بوك facebook
مره بتفرج على واحده بيسألوها انتى عارفه ان الصور ممكن تتركب على حاجات مش كويسه
ردت بكل ثقه اه طبعا بيحصل
فسألها المذيع طيب انتى حاطه صورك فى الفيس بوك
قالتله ايوه
فقالها طيب مش خايفه
قالتله الواحد لو خاف من كل حاجه مش هايعمل حاجه
ايه التناقض ده ؟؟؟؟؟ مش فاهمه و خصوصا انى بحس ان فيه ناس ما عندهمش ثقافه احترام الاخرين
و اكتر حاجه بجد زعلتنى انى عرفت ان فيه بنت مصريه عندها 12 سنه انتحرت لما جارها لقاها على الفيس بوك
و اتريق عليها لدرجه انها انتحرت
مش بهاجم الفس بوك او غيره
بس بقول خدوا بالكم علشان الندم مش حلو
و على رأى محمد هنيدى كله بييجى بعد الجواز العرفى و ماحدش بييجى قبل الجواز العرفى

الام العاشقه و الاب العاشق

2008-03-11T07:52:00.000-07:00

قريت فى مجله عن ام سنها 33 و ام ل 8 اطفال تركت اولادها مع اختهم البالغه من العمر 15 سنه
دون مال او طعام و ذلك بعد ان تعرفت على رجل اعمل من النت و سافرت معه لقضاء شهر العسل
هذه السيده ليست عربيه و لكنها امريكيه و لما جاه البوليس وجدوا الاطفال فى حاجه من عدم النظافه
و سوء الغذيه غير طبيعى
و وجهت إلى الام عده اتهامات و قالت البنت انها كانت تضطر إلى سرقه الطعام لتطعم اخواتها
فيه ناس طالبت بأن الست دى تعقم و بتعريضها لنفس الظروف اللى عاش فيها اولادها بدون طعام او ملابس نظيفه

الموضوع ده ما قدرتش امر عليه مرور الكرام
حسيت انى لازم اقف عنده و لان ده بيحصل كمان عندنا فى المجتمعات العربيه
اه مش بنفس الصوره
بس فيه ناس مع الاسف بتعيش بالطريقه دى
ماعندهاش اى اهتمام لاولادها و سهل اوى انها ترميهم و المهم هو نفسى
و ياما لقينا رجاله سابوا اولادهم و جريوا وراء بنت صغيره
بيعيشوا بنظريه يلا نفسى
الحمد لله ان دينا بيأمرنا بكل فضيله
ايه الغلط اللى خلى الناس دى تعمل كده
انا اصلا مش متخيله ان حد يجيب حد للدنيا و فجأه يتخلى عنه بالطريقه دى
حبيت اوجه نداء لكل انسان عاقل اتقى الله فى اولادك و كن لهم الاب و الام التى يتمنوه

يا مأمن الرجال يا مأمن الميه فى الغربال

2008-03-03T03:29:00.000-08:00

يا مأمن الرجال يا مأمن الميه فى الغربال
ياترى دى مقوله صحيحه
و ياترى حلم هارون الرشيدى يطارد كل الرجاله
و بيفكروا يا ترى لو كان عنده الامكانيه انه يعمل مثله هايكون اسعد
و يا ترى امرأه واحده لا تكفى فعلا
بتفكرأ ازاى يا رجاله ؟
دايما بيقولوا ان المرأه صعبه التفسير
آل يعنى همه اللى كتبا مفتوح
زى ما احنا لغز بالنسبه ليكم انتوا كمان بالنسبه لينا نفس اللغز
بس السؤال هل كل حاله خاصه بنفسها فقط
يعنى كل مرأه لغز و كل رجل لغز
ام ان هناك قواعد و شواذ عن القواعد كمان
الخوف لا يكون هارون الرشيدى هو القاعده
و كمان دلوقت و مع وجود النت و الموبايلات اصبح الحلم سهل المنال
مين منال دى ؟ ماعلينا ربنا يستر على بنات حواء

فى عيد الحب لابد ان نتذكر من نحبهم و يحبونا

2008-02-14T16:18:00.000-08:00

هل تذكر كل من احبوك اليوم
هل ورد فى فكرك كل من كانوا يوما احبائك
لم يكن الحب هو الذى بين الحبيب و الحبيبه
و لن اذكر انواع الحب
و لكن اردت التذكير بأن هناك من احبوك و لم تحببهم
هناك من احببتهم و لم يحبوك
و هناك من احببتهم و احبوك و لكن شيأ ما فرق بينكم
و هناك من ظلوا فى القلب للابد
و هناك من رافقك فى رحله الحياه حتى الان
فهل تذكرتهم
و هل يتذكونك هم بدورهم ام ان الدنيا شغلتنا حتى عن التذكر
فى عيد الحب
اقول لكل المحبين اهنأؤا بحبكم

اختيار صحيح

2008-02-14T07:34:00.000-08:00

ازاى تقدر تعرف انك بتحب شخص معين من دون الناس؟
سؤال صعب الرد عليه
لان الحب ارتباط وثيق
و نفسى اعرف ازاى الواحد فجأه يحس انه بيحب انسان و ان سعادته معاه
و انه مش بيتهيأله انه بيحب
و ان المشاعر دى حقيقيه و ان وجوده مع الشخص ده بيحسسه بالامان
و ان لايمكن حد يحل محله

مش هو ده الحب؟

و لما هو ده الحب اللى بيتهيألى لن يختلف عليه اتنين
ليه الاتهامات المتبادله بين الطرفين
ليه مش كل واحد محدد هو عايز ايه ؟ و محتاج ايه ؟ و هايدى ايه للطرف التانى ؟
متهيألى لو كل واحد كان صريح فى الاجابه عن الاسئله دى
اكيد هايقدر يلاقى اللى بيدور عليه
لانه بمنتهى البساطه انت لما بتروح السوبر ماركت بتكون محدد من قبلها انت هاتشترى ايه
و ايه الطلبات اللى انت محتاجها
و كمان هاتدفع كام فى مقابل الطلبات دى
هو ده بالظبط مع شويه اختلافات
انت مش بتمشى فى الشارع و بتقول الله كل دى بنات
و اى واحده منهم تصلح
و انتى كمان
مش هايجيلك عارسان و تقولى كلهم يصلحوا
دور جواك و انتى كمان دورى جواكى و حددوا عايزين ايه
قبل ما ترحوا للسوبر ماركت

نيو لوك الكلام

2008-02-12T02:48:00.000-08:00

اظاهر ان النيو لوك وصل لكل حاجه
حتى الكلام
حاجه غريبه جدا
احنا زهقنا حتى من الكلام
و الجديد ان الناس بتطلع بموضه فى الكلام
نيو لوك كلام يعنى
و الموضه اليومين دول كلمه "حد"
و رغم انها كلمه تدل على ان المتكلم عنه نكره
إلا انها و بقدره قادر اصبحت كلمه استايل
تلاقى الممثله او المذيع فى التليفزيون بيتكلم و بكل فخر بيتكلم على شخصيه معروفه
و تلاقيه بيقول الممثل الفولانى ده "حد " كويس و الكاتب ده " حد "
عليه النعمه لو حد قال عليه حد كنت دفنته فى مكانه
لاء و الادهى تلاقى اعلان سخيف طلعلك فجأه
و يقولك و كسب فلوس كتيره موله
و كسب فلوس كتيره فحت
نستنتج من ده كله ان اكيد
مامى نحله علشان تجيب العسل دا كله

بسم الله نبدأ

2008-02-11T16:45:00.000-08:00

مش عارفه ليه فجأه طق فى مخى انى اعمل مدونه
و على رأى احمد فؤاد نجم روكنه ليه
كتير بيكون فى نفسى انى اكتب حاجه
و حتى لو علق عليها واحد
و اهتم بيها اكيد هاكون مبسوطه
فجأه و بدون سابق انذار حتى مش عارفه انام من غير ما اقول للناس تعالوا بينا نحكى مع بعضينا
و عارفين اكتر حاجه خايفه منها ايه
انى اكون بأذن فى مالطه
و المشكله الاكبر و المحبطه انى ما الاقيش حد يدخل يرد عليه
بس يمكن ساتها هاكون مبسوطه برضوا
لانى لقيه مساحه اتكلم فيها مع نفسى و براحتى
مش هاطول كتير بس الحمد لله انى هنـــــــــــــــــــــــــــــــــــا فى روكنتى لوحدى